নিয়মীয়া বাৰ্তা ১৫ ফেব্ৰুৱাৰীঃ গোলকীয় উষ্ণতাৰ বিৰূপ প্রভাৱ বিশ্বৰ বৃহত্তম বৰফৰ ভাণ্ডাৰ এণ্টার্কটিকাতো স্পষ্ট হৈ পৰিছে৷ জলবায়ু পৰিৱর্তনৰ প্রচণ্ড ভাবুকি কঢ়িয়াই আনি এণ্টার্কটিকাত তাপমাত্রাই অভিলেখ গঢ়িলে৷ প্রথমবাৰৰ বাবে এণ্টার্কটিকাত ২০ ডিগ্রী চেলছিয়াছ (৬৮ ফাৰেনহাইট) অতিক্রম কৰিলে৷ প্রতি তিনি দিনৰ মূৰে মূৰে এণ্টার্কটিকাত তাপমাত্রা নিৰীক্ষণ কৰি থকাৰ সময়তে যোৱা ৯ ফেব্রুৱাৰীত অঞ্চলটোৰ তাপমাত্রা প্রথমবাৰৰ বাবে ২০ ডিগ্রী চেলছিয়াছ অতিক্রম কৰি ২০.৭৫ ডিগ্রী চেলছিয়াছ লিপিবদ্ধ কৰিলে৷ ব্রাজিলৰ বিজ্ঞানীয়ে প্রকাশ কৰা মতে, ১৯৮২ চনত এণ্টার্কটিকাৰ ছিগনী দ্বীপত তাপমাত্রা সর্বাধিক ১৯.৮ ডিগ্রী চেলছিয়াছ লিপিবদ্ধ কৰা হৈছিল৷ ৩৮ বছৰ পাছত তাপমাত্রা বৃদ্ধিয়ে এণ্টার্কটিকাত অভিলেখ গঢ়িলে৷ উল্লেখ্য যে বৰফৰ বিশাল ভাণ্ডাৰ এণ্টার্কটিকাত সর্বনিম্ন –৮৯.২ ডিগ্রী চেলছিয়াছ তাপমাত্রাৰ অভিলেখ আছে৷ এণ্টার্কটিকাত তাপমাত্রা বৃদ্ধিয়ে অঞ্চলটোৰ লগতে পৃথিৱীৰ মহাসাগৰৰ জল পৃষ্ঠলৈও অশনি সংকেত কঢ়িয়াই অনাৰ সম্ভাৱনা আছে৷