নিয়মীয়া বাৰ্তা ১৫ ফেব্ৰুৱাৰীঃ বিশ্বজুৰি শংকাৰ সৃষ্টিকাৰী ক’ৰোনা ভাইৰাছৰ বাতৰি পৰিৱেশন কৰা চীনৰ দুগৰাকী সাংবাদিক সন্ধানহীন হোৱাক লৈ চাঞ্চল্যৰ সৃষ্টি হৈছে৷ দেশখনৰ য়ুহান প্রদেশত উদ্ভৱ ঘটা ক’ৰোনা ভাইৰাছৰ বাতৰি প্রচাৰ কৰি চীনৰ চৰকাৰে লোৱা পদক্ষেপক সমালোচনা কৰাৰ বাবে সাংবাদিক দুজনক প্রশাসনে অপহৰণ কৰাৰ সন্দেহ কৰা হৈছে৷ চীনৰ য়ুহান প্রদেশৰ চিকিৎসালয়ত পর্যাপ্ত সুবিধা নথকাৰ বাতৰি ছ’চিয়েল মিডিয়াযোগে প্রচাৰ কৰা ছেন কুইছি নামৰ মানৱ অধিকাৰ অধিবক্তা তথা মুক্ত সাংবাদিকজন যোৱা ৬ ফেব্রুৱাৰীৰ পৰা সন্ধানহীন হৈছে৷ উল্লেখ্য যে ছেনে যোৱা ২৪ জানুৱাৰীৰ পৰা ক’ৰোনা ভাইৰাছ আক্রান্ত অঞ্চলত চৰকাৰৰ হেমাহিৰ কথা ছ’চিয়েল মিডিয়াযোগে প্রচাৰ কৰি আহিছিল৷ ৩৪ বছৰীয়া ছেনৰ এই পদক্ষেপক লৈ স্থানীয় প্রশাসন ক্ষুণ্ণ হৈছিল আৰু তাৰ পৰিণতিতেই হয়তো ছেনক অপহৰণ কৰা হৈছে৷ আনপিনে য়ুহানৰ ব্যৱসায়ী ফেং বিন নামৰ সচেতন লোকজনো বিগত চাৰি দিন ধৰি সন্ধানহীন হৈ আছে৷ ছেনৰ দৰেই ফেং বিনেও ক’ৰোনা ভাইৰাছত আক্রান্ত অঞ্চলৰ বাতৰি ইউ টিউবযোগে প্রচাৰ কৰি আহিছিল৷ যোৱা ২৫ জানুৱাৰীত ফেং বিনে আপলোড কৰা এটি ভিডি’ আনকি চীনৰ প্রশাসনে নিষিদ্ধ কৰি দিছিল৷ এই সন্দর্ভত ফেং বিনক স্থানীয় আৰক্ষীয়ে সোধা–পোছা কৰি এৰি দিয়ে যদিও পিছলৈ পুনৰ ৯ ফেব্রুৱাৰীত ফেং বিনে আন এটি ভিডি’ আপলোড কৰে৷ ইয়াৰ পাছতেই ফেং বিন সন্ধানহীন হৈ পৰে৷ দেশখনত চাঞ্চল্যৰ সৃষ্টি কৰা দুই সাংবাদিক সন্ধানহীন হোৱাক লৈ চীনা কর্তৃপক্ষই কোনোধৰণৰ মন্তব্য আগবঢ়োৱা নাই৷