নিয়মীয়া বাৰ্তা ১০ আগষ্টঃ ভেনিজুৱেলাৰ ৰাষ্ট্রপতি নিকোলাছ মাডুৰোক ক্ষমতাচ্যুত কৰাৰ বাবে অভ্যুত্থানৰ পৰিকল্পনা কৰা দুই আমেৰিকান সৈনিকৰ বিৰুদ্ধে দেশখনৰ আদালতে ২০ বছৰকৈ কাৰাদণ্ডৰ ৰায় শুনাইছে৷ যোৱা মে’ মাহত এই ব্যর্থ অভ্যুত্থানৰ নেতৃত্ব দিছিল লিউক ডেনমান আৰু আইৰান বেৰীয়ে৷ কাৰাকাছৰ আদালতে দুয়োগৰাকীকে ভেনিজুৱেলাৰ বিৰুদ্ধে ষড়যন্ত্র চলোৱা, দেশখনলৈ অবৈধ অস্ত্র সৰবৰাহ আৰু সন্ত্রাসবাদৰ পৰিকল্পনা কৰাৰ গোচৰত দোষী সাব্যস্ত কৰিছে৷ স্মর্তব্য যে দুয়োজন আমেৰিকান সৈনিকে মে’ মাহত আন ১১জন লোকৰ সৈতে কলম্বিয়াৰ পৰা সমুদ্র পথেৰে আহি ভেনিজুৱেলাত প্রৱেশ কৰিছিল৷ ভেনিজুৱেলাৰ বন্দৰত দেশখনৰ সেনাই আটাইকেইজন লোকক গ্রেপ্তাৰ কৰিছিল৷ ইফালে এটর্নী জেনেৰেল টাৰেক উইলিয়াম ছাবে আজি উল্লেখ কৰিছে যে আন অভিযুক্তসকলৰ বিৰুদ্ধে বিচাৰ প্রক্রিয়া চলাই যোৱা হ’ব৷ ভেনিজুৱেলাই আমেৰিকান নাগৰিককেইজনে দেশখনৰ চৰকাৰৰ বিৰুদ্ধে অভ্যুত্থানৰ পৰিকল্পনা চলোৱাৰ অভিযোগ অনাৰ পাছতে মার্কিন ৰাষ্ট্রপতি ড’নাল্ড ট্রাম্পে ইয়াক অস্বীকাৰ কৰি আহিছে৷