নিয়মীয়া বাৰ্তা, ১১ আগষ্টঃ কোকৰাঝাৰ জিলাৰ তুলসীবিল আৰক্ষী চকীৰ অন্তর্গত পানীজানি দ্বিতীয় খণ্ডত আজি আৰক্ষীয়ে অভিযান চলাই বৃহৎ পৰিমাণৰ অবৈধ অস্ত্র–গুলী–বাৰুদ উদ্ধাৰ কৰিবলৈ সক্ষম হয়৷
কোকৰাঝাৰ জিলাৰ আৰক্ষী অধীক্ষক ৰাকেশ ৰৌছনে সদৰী কৰা মতে, এক গোপন সূত্রৰ পম খেদি তুলসীবিল এলেকাৰ পানীজানি দ্বিতীয় খণ্ডৰ জংঘল এলেকাত পুৱাৰে পৰা অভিযান চলোৱা হয়৷ কোকৰাঝাৰ জিলাৰ অতিৰিক্ত আৰক্ষী অধীক্ষক (সদৰ) মুকুট ৰাভাৰ নেতৃত্বত আৰু তুলসীবিল উপ–আৰক্ষী চকীৰ ভাৰপ্রাপ্ত বিষয়া পার্থপ্রতিম বিশ্বাস আৰু টাউন উপ–পৰিদর্শক লাটুক দাসৰ সহযোগত চলোৱা এই অভিযানত দলটোৱে পুতি থোৱা অৱস্থাত এ কে–৫৬ ৰাইফল দুটা, মেগজিন তিনিটা, ৩৬ নম্বৰৰ এইচ ই গ্রেনেড দুটা, ২১১ ৰাউণ্ড সক্রিয় গুলী উদ্ধাৰ কৰিবলৈ সক্ষম হয়৷ ঘটনা সন্দর্ভত কাকো গ্রেপ্তাৰ কৰিবলৈ সক্ষম হোৱা নাই৷